Accidente de Tren No Porriño

Un novo accidente ferroviario en Galicia deixa catro falecidos e 47 feridos no Porriño (Pontevedra)

Fomento asegura que o convoi superara as inspeccións e que o maquinista tiña "formación e cualificación"

Un novo accidente ferroviario grave deixou este venres en Galicia catro falecidos e 47 feridos, tras descarrilar un tren que cubría a liña Vigo-Oporto entre os municipios de Mos e O Porriño (Pontevedra).

O sinistro tivo lugar sobre as 9,25 horas, nun tramo de vía recto, xusto á entrada da estación do Porriño. Por circunstancias aínda non aclaradas, un tren 'Celta' de tres vagóns con 65 persoas a bordo saíuse da vía, a máquina locomotora envorcou e acabou impactando contra a base de formigón dunha torre de electricidade.

Como consecuencia do impacto, tres persoas faleceron no acto: o maquinista, José Arnaldo R., de 47 anos e orixinario da localidade portuguesa de Ermesinde; o interventor, Miguel Ángel V., de 66 anos de idade e nacido en Lugo; e un turista norteamericano, que tivo que ser excarcerado. Así mesmo, outro traballador de Renfe, un mozo vigués de 23 anos de idade, Joaquín R.G., foi trasladado en estado moi grave ao Hospital Álvaro Cunqueiro (HAC) de Vigo, onde faleceu pouco despois.
Por outra banda, outras 47 persoas resultaron feridas de diversa consideración, e foron trasladadas a distintos centros sanitarios: o Hospital Álvaro Cunqueiro, Fátima e Povisa, en Vigo; e ao punto de atención continuada (PAC) do Porriño. Entre os feridos hai persoas de, polo menos, oito nacionalidades, aínda que a maioría, 26, son españois.

Ata o lugar do sinistro desprazáronse numerosos efectivos de emerxencias médicas: ambulancias, dous helicópteros, e persoal sanitario do PAC do Porriño, ademais dun equipo de psicólogos para atender as vítimas e os seus familiares.

AUTORIDADES
Ademais do presidente da Xunta, Alberto Núñez Feijóo, e do presidente do Parlamento galego, Miguel Santalices, acudiron ata a estación do Porriño a alcaldesa desa localidade; os rexedores de Mos e As Neves; a presidenta da Deputación de Pontevedra; o vicepresidente galego, Alfonso Rueda, e os candidatos á presidencia da Xunta do BNG e de En Marea, Ana Pontón e Luís Villares, respectivamente.
Así mesmo, estivo no Porriño o ministro de Fomento en funcións, Rafael Catalá, responsables de Renfe, ADIF e de Comboios de Portugal e o secretario e un técnico da Comisión de Investigación de Accidentes Ferroviarios (CIAF).

Sobre as 18,00 horas da tarde chegaba ao Posto avanzado da Axencia Galega de Emerxencias o presidente do Goberno en funcións, Mariano Rajoy, quen trasladou, en nome do Executivo, o seu "pésame" ás familias dos falecidos. Así mesmo, mostrou o seu desexo de pronta recuperación dos feridos, e confirmou que, a esa hora da tarde, había unha ducia de persoas ingresadas en varios centros hospitalarios.
Numerosas autoridades, políticos, organizacións, sindicatos, institucións provinciais e municipais trasladaron as súas condolencias e lamentaron os feitos.

TRABALLOS NA VÍA
Pola súa banda, o ministro de Fomento en funcións, Rafael Catalá, confirmou que se estaban a realizar "traballos de mantemento rutineiros" na vía principal do tramo onde se produciu o accidente, e apuntou que, nestes casos, o tráfico ferroviario se desvía a unha vía secundaria e infórmase os maquinistas para que reduzan a velocidade.

Catalá sinalou que aínda non se coñecen os detalles do sinistro, polo que pediu "non especular" sobre se a velocidade do tren era inadecuada.
Así, explicou que haberá que analizar as caixas de rexistro do tren, o contido do cal foi xa extraido e está custodiado, a disposición do Xulgado de instrución número 2 do Porriño. Del mesmo modo, o material rodante sinistrado (locomotora e vagóns) será retirado e depositado baixo custodia, a disposición do xulgado.

O titular de Fomento, en todo caso, precisou que este tren, un modelo diesel da serie 592, pasou por unha inspección "rigurosísima" en maio, que incluíu "practicamente o desmontaxe completo do tren", e outra revisión menos minuciosa este mesmo xoves.
Tanto o tren como o maquinista tiñan todas as certificacións e garantías", apuntou, e recordou que os condutores do tren 'Celta' --que son españois e portugueses, e fan dende hai uns cinco anos o tramo completo-- recibiron formación específica.
Na mesma liña pronunciouse o presidente de Comboios de Portugal, Manuel Queiró, quen mesmo chegou a sinalar que "nada indica que fose un fallo humano ou de material", senón que se deron "circunstancias anormais" que haberá que descubrir.

"DEMASIADO RÁPIDO"
Malia a falta de datos técnicos, algúns pasaxeiros explicaron, en declaracións aos medios antes de ser evacuados en autobús, que o tren ía "demasiado rápido". Un home, que viaxaba no convoi coa súa muller (ferida leve nunha perna), mostrou a súa sorpresa aos xornalistas porque "o tren ía demasiado rápido para o vello que era".
Así mesmo, outra pasaxeira, que viaxaba no terceiro vagón e ía durmida no momento do impacto, sinalou que o tren "ía rápido" e "bastante cheo". Esta rapaza resultou ferida leve ao sufrir un golpe na cara.

TRES ANOS DESPOIS DE ANGROIS
Este sinistro prodúcese tres anos, un mes e 15 días despois do rexistrado no barrio compostelano de Angrois, onde un tren Alvia descarrilou na curva da Grandeira e morreron 80 persoas, ademais de quedar feridas máis dun centenar.
Naquel accidente, o maquinista recoñeceu tomar a curva cun exceso de velocidade por un despiste, xa que recibira unha chamada do interventor, que lle indicaba por onde entrar na estación de Pontedeume (A Coruña).

O condutor é a día de hoxe o único imputado nunha causa xudicial que segue aberta despois de que a Audiencia Provincial da Coruña botase atrás a decisión do segundo xuíz instrutor de pechar a investigación.
Non obstante, tanto as vítimas como o avogado do maquinista manteñen que hai máis responsabilidades, políticas e técnicas, que depurar no caso, posto que, segundo denuncian, se tomaron medidas tanto por Renfe como por Adif que afectaron á seguridade e relacionadas coas presas por inaugurar a liña no marco da chegada da alta velocidade a Galicia.

Dáse a circunstancia de que quen ostenta na actualidade a carteira de Xustiza en funcións, ademais da de Fomento, Rafael Catalá, era secretario de Estado de Planificación e Infraestruturas do Ministerio de Fomento entón. Catalá recibiu estas novas competencias tras ser nomeada Ana Pastor presidenta do Congreso dos Deputados.

Así as cousas, tras este novo e grave accidente ferroviario en Galicia, está por ver as repercusións que ten na campaña electoral que se iniciaba na comunidade galega este venres, xornada na que todos os partidos suspenderon os seus actos.

Noticia de Galicia Confidencial