Actuación Emilio Rúa

Domingo 15 de maio ás 21:00 h (Na Casa da Cultura)
Recital do cantautor galego Emilio Rúa en homenaxe a Manuel María

Biografia:

Nace en Vendas dá Barreira (Riós- Ourense) no seo dunha familia de músicos, da cal é o fillo menor entre cinco irmáns. Á temperá idade de sete anos comeza a cantar no grupo Concorde Atenea, unha orquestra familiar formada polo seu pai e os seus irmáns coa que percorren Galicia e os seus arredores. Guitarra en man comeza a compoñer e a presentarse nalgún que outro concurso. 

Tras un dos seus recitais ofréceselle a oportunidade de gravar un primeiro CD, publicado no ano 2000, no cal colaborou a cantante Uxía Senlle nun dos temas. Froito deste primeiro traballo discográfico foron as súas actuacións no Instituto Cervantes de Manchester e no de Leeds, ademais de ter a oportunidade de compartir escenario con Ismael Serrano ou cartel con Pedro Guerra, así como numerosas actuacións en radio e televisión galegas.

No ano 2004 Emilio Rúa participa na V Mostra Nacional de Canción de Autor (Cantigas de Maio) de Ceutí (Murcia), obtendo o segundo premio, e cantando en galego.

En 2005 se presenta ao certame Novos Cantautores de Elx, obtendo o primeiro premio, tamén cantando na súa lingua orixinaria, o galego. Ambos certames contaron co apoio de Discópolis Radio 3, o programa de Radio Nacional de España que dirixe e presenta Jose Miguel López.

En 2006 grava o seu segundo traballo discográfico “ Vida Miña” no selo BOA, gravación que conta coa produción artística de Uxía Senlle e os medios técnicos de Segundo Grandío ( Casa de Tolos). Este traballo supuxo para Emilio Rúa un antes e un despois na súa carreira artística.

Rúa fai gala sempre dun estilo persoal e característico tanto nas cancións propias, en álbunes como 'Interior', como nas versións de temas como 'A Moza de onte', de Antonio Veiga; 'Somewhere Over The Rainbow', do filme O mago de Oz ; 'Miña Maruxa', de Andrés do Barro ou a revisión do clásico galego 'María Soliña', que forman as cancións de 'Destino Sur' .

'Interior' é un disco producido pola cantante galega Uxía e o músico brasileiro Sérgio Tannus, onde se exploran novos rexistros nunca antes utilizados por Rúa, familiares e próximos. Entre as cancións figuran temas asinados polo propio Emilio coa guitarra ou o piano acústico, pero ademais leva a cabo versións doutros compositores como Mozo César e The Beatles.

Así mesmo, utiliza a Manuel Rivas para poñerlle música a un dos seus poemas.
Del dixo a súa produtora Uxía Senlle ' transpórtanos a ese mundo onde o amor e a beleza do cotián son aliados para ser máis felices. O mundo rural que describe aparece vestido de nostalxia', e engade ' O que subliñaría é a forza expresiva, rotunda e profunda das súas composicións: pop elegante, baladas intensas'.

Contou coas achegas de coñecidos músicos de Galicia e Portugal e colaboracións destacadas coma a de Luís Tosar, Guadi Galego, Toni Lomba, Quin Farinha, Marcos Teira, Budiño e a mesma Uxía. Asemade, e como nos seus traballos anteriores, mergúllase na música tradicional coa súa versión do tema Lela, reinterpretando tamén cancións de autores como Magín Blanco, Uxía e Sérgio e poñendo música a unha das poesías de Manuel Rivas.

Ten un novo disco chamado "Querida alegría" que saco o 3 de xaneiro do 2016.

Este domingo 15 poderemos gozar do seu musica a partir das 21:00 na casa dá cultura